" ملک بھر میں یوم پاکستان آج جوش و جذبے سے منایا جائے گا "

”

اسلام آباد: ملک بھر میں آج یوم پاکستان قومی جوش و جذبے سے منایا جائے گا۔

یوم پاکستان کے موقع پر دن کا آغاز وفاقی دارالحکومت میں 31 جبکہ صوبائی دارالحکومتوں میں 21 ،21 توپوں کی سلامی سے ہو گا۔ یوم پاکستان کی مرکزی تقریب شکر پڑیاں پریڈ گراؤنڈ میں منعقد ہو گی جہاں مسلح افواج کے دستے اپنی بھرپور طاقت اور نظم کا مظاہرہ کریں گے۔

سعودی عرب کے وزیر دفاع شہزادہ خالد بن عبدالعزیز یوم پاکستان پریڈ کے مہمان خصوصی ہوں گے۔ شکرپڑیاں پریڈ گراؤنڈ کی تقریب میں آرمی چیف جنرل عاصم منیر سمیت سروسز چیف موجود ہوں گے جبکہ اس کے علاوہ وفاقی وزرا، ارکان اسمبلی اور پاکستان میں غیر ملکی سفرا شرکت کریں گے۔

پاک فوج کے مختلف یونٹوں کے دستے سلامی پیش کریں گے جبکہ پاک فضائیہ کے جدید طیارے جے ایف 17، ایف 16 اور میراج طیارے فضائی مظاہرہ کریں گے۔

یہ بھی پڑھیں: پی آئی اے کی نجکاری کیلئے باضابطہ عمل درآمد کا نوٹیفکیشن جاری

صدر مملکت آصف علی زرداری پریڈ کا معائنہ کریں گے اور تقریب سے خطاب کریں گے۔ پریڈ میں صوبوں کا خصوصی ثقافتی شو بھی ہو گا اور فلوٹ مظاہرہ کریں گے جبکہ دفاع کے شعبہ میں پاکستان کی ترقی اور جدید اسلحہ کی نمائش کی جائے گی۔

مزار اقبال پر گارڈز کی تبدیلی کی تقریب بھی منعقد ہو گی۔ نماز فجر کے اجتماعات میں ملک و ملت کی سلامتی اور استحکام کے لیے خصوصی دعائیں مانگی جائیں گی جبکہ دیگر مذاہب کے ماننے والوں کی عبادت گاہوں میں بھی خصوصی دعائیہ تقاریب کا اہتمام کیا جائے گا۔

سیاسی اورمذہبی جماعتوں کے زیراہتمام یوم پاکستان کی مناسبت سے سیمینار اور کانفرنسوں کا انعقاد ہوگا اور ریلیاں نکالی جائیں گی۔

”